अखिल भारतीय वाणी समाज प्रबोधन संस्था ही समाजाच्या सामाजिक, सांस्कृतिक, शैक्षणिक आणि संघटनात्मक उन्नतीसाठी कार्यरत असलेली एक अग्रगण्य संस्था आहे
संस्थेची स्थापना धुळे येथे मा. सुनील नेरकर यांच्या नेतृत्वाखाली झाली. स्थापनेपासूनच संस्थेने समाजातील विविध प्रश्नांना वाचा फोडत समाजहिताच्या चळवळी उभारल्या. समाजाच्या सर्वांगीण विकासासाठी कार्य करत असताना संस्थेने प्रथम महाराष्ट्र राज्यात आपले कार्य विस्तारले आणि त्यानंतर देशभरातील वाणी समाजाला जोडत अखिल भारतीय स्तरावर संस्थेचा विस्तार घडवून आणला.
पिंपरी-चिंचवड परिसरात सन २००८ पासून संस्थेच्या विस्ताराची सुरुवात मा. सुरेश (बापू) शिरुडे यांच्या नेतृत्वाखाली झाली. त्यांनी प्रदेशाध्यक्ष म्हणून जबाबदारी स्वीकारल्यानंतर महाराष्ट्रातील विविध जिल्ह्यांत संस्थेचे कार्य पोहोचवून संघटन अधिक बळकट केले. त्यांच्या नेतृत्वाखाली समाज संघटन, जनजागृती आणि समाजहिताचे अनेक उपक्रम राबविण्यात आले.
संस्थेच्या कार्यातील एक ऐतिहासिक आणि समाज परिवर्तन घडवून आणणारे यश म्हणजे लाडशाखीय वाणी समाजाला इतर मागास प्रवर्ग (OBC) दर्जा मिळवून देण्यासाठी केलेला सातत्यपूर्ण पाठपुरावा आणि संघर्ष. या यशामुळे समाजातील शैक्षणिक, सामाजिक आणि आर्थिक प्रगतीस नवी दिशा मिळाली.
तसेच समाजातील विवाह समस्यांवर उपाय म्हणून संस्थेने लाडशाखीय आणि लिंगायत वाणी या पोटजातींमध्ये वैवाहिक संबंध प्रस्थापित करण्यासाठी विशेष प्रयत्न केले. या माध्यमातून समाजात "रोटी-बेटी व्यवहार" सुरू होऊन सामाजिक एकात्मता अधिक दृढ झाली. या सामाजिक परिवर्तनामुळे समाजातील युवक-युवतींसाठी विवाहाच्या संधी वाढल्या आणि समाज एकसंघ होण्यास मोठी मदत झाली.
आज अखिल भारतीय वाणी समाज प्रबोधन संस्था ही समाजहित, समाज संघटन, शिक्षण, संस्कृती संवर्धन आणि सामाजिक न्याय या मूल्यांना केंद्रस्थानी ठेवून कार्य करणारी एक प्रेरणादायी संस्था म्हणून ओळखली जाते. समाजाच्या प्रगतीसाठी, भावी पिढ्यांच्या उज्ज्वल भविष्यासाठी आणि राष्ट्रीय विकासात वाणी समाजाचे योगदान अधिक प्रभावी करण्यासाठी संस्था कटिबद्ध आहे.